მოძრაობა „სამოქალაქო ერთობა“ საზოგადოებას ქუთაისში 10 ივნისს, კოალიცია ,,ქართული ოცნების“ მიერ დაგეგმილ აქციაზე მისვლისკენ მოუწოდებს.  
ამის შესახებ, მოძრაობის წევრებმა ზურაბ ვაზაგაშვილის სახელობის დარბაზ ,,ჯაზუში“ განაცხადეს.
როგორც მოძრაობის წევრებმა აღნიშნეს, საქართველოში სამოქალაქო საზოგადოების ყველა ფენა არნახულ დევნას განიცდის.
მოძრაობის წევრის იური ვაზაგაშვილის განცხადებით, დღეს ქვეყნის გადასარჩენად ერთად დგომაა საჭირო.
„დღეს შეიკრიბა „სამოქალაქო ერთობის“ საბჭო და იმერეთის მოსახლეობისადმი განცხადება შეიმუშავა, რათა როგორც თბილისში ვაჩვენეთ 27 მაისის აქციაზე ერთად დგომა, ასევე, უნდა მოხდეს იმერეთშიც“ - განაცხადა ვაზაგაშვილმა და აღნიშნა, რომ ხელისუფლებამ უნდა დაინახოს, რომ ყველა ერთადაა და ხალხი იმ უსამართლობას და განუკითხაობას, რაც დღეს ხდება, არ შეეგუება.
მისი თქმით, ,,სამოქალაქო ერთობის“ აქტივისტებმა ბიძინა ივანიშვილისთვის მოქალაქეობის მინიჭების მოთხოვნით, იმერეთში, უანგაროდ 50 ათასამდე ხელმოწერა შეაგროვეს და ისინი, აქტიურად არიან ჩაბმული საზოგადოების მობილიზების პროცესში.
მისივე თქმით, ხელისუფლებამ ვერ მოახერხა სამოქალაქო საზოგადოების დაშინება თბილისში და ვერც იმერეთში მოახერხებს.