საქართველოს პრეზიდენტმა მიხეილ სააკაშვილმა ამერიკის შეერთებული შტატების სახელმწიფო მდივნის ჰილარი კლინტონის საქართველოში ვიზიტიდან რამდენიმე მნიშვნელოვანი გზავნილი გამოკვეთა.
როგორც მიხეილ სააკაშვილმა ბათუმში ჰილარი კლინტონის ვიზიტის შეფასებისას აღნიშნა, პირველი გზავნილი თავდაცვის სფეროში საქართველოს თავდაცვისუნარიანობის გაზრდის პროგრამის გამოცხადება იყო.
მისი თქმით, მეორე საკითხია ის, რომ აფხაზეთსა და ცხინვალში მცხოვრებ საქართველოს თანამემამულეებს მთელ მსოფლიოში მოგზაურობის საშუალება ექნებათ.
„ეს ჩვენ თანამემამულეებს, რომლებიც იქ დარჩნენ საშუალებას მისცემს არ აიღონ ძალით რუსული პასპორტები და საქართველოს სახელმწიფოს მიერ გაცემული დოკუმენტებით მთელ მსოფლიოში იმოგზაურონ“ - განმარტა პრეზიდენტმა.
მისი შეფასებით, ეს აშშ-ს მხრიდან წარმოუდგენლად დიდი დიპლომატიური მხარდაჭერაა და ამ მიმართულებით ბევრი მუშაობაა საჭირო.
მისი განმარტებით, ვიზიტის მესამე გზავნილი არჩევნებზე ბევრი საერთაშორისო დამკვირვებლის ჩამოყვანაა.
როგორც პრეზიდენტმა განმარტა, ნათლად ითქვა, რომ უამრავი რაოდენობის ნამდვილ დამკვირვებლებს გამოგზავნიან და არა მათ, რომლებიც ვითომ დამკვირვებლები არიან.
„საქართველოში ნამდვილი დამკვირვებლები, ნამდვილი სენატორები, ევროპარლამენტის წევრები ჩამოვლენ. ის ხალხი ვისაც ვერ მოისყიდიან, ვისაც ვერ დააშანტაჟებენ და ვინც მართლა იტყვის, რომ საქართველოში სამართლიანი და გამჭვირვალე არჩევნები ჩატარდა“ - აღნიშნა პრეზიდენტმა და დასძინა, რომ მათი ჩამოსვლა ქვეყნის შიდა სიტუაციის მანიპულაციის გარედან მსურველს საშუალებას არ მისცემს, სხვადასხვა პროვოკაციების გამოყენებით საქართველო სწორი გზიდან გადაიყვანოს.
„დღეს ძალიან კონკრეტული გზავნილები გაკეთდა. ეს ნიშნავს, რომ სწორ კურსზე ვდგავართ. გუშინ გამოცხადდა, რომ ქართველები ევროპაში მალე უვიზოდ იმოგზაურებენ, იმიტომ რომ უვიზო მიმოსვლასთან დაკავშირებით დიალოგი დაიწყო“- განაცხადა მიხეილ სააკაშვილმა.
მისივე ინფორმაციით, საქართველოს გეოპოლიტიკური სიტუაცია სწორი მიმართულებით თავბრუდამხვევად იცვლება. ეს კი, მისივე განმარტებით, საქართველოში მცხოვრები შეჭირვებული მოსახლეობისთვის კეთდება.