5 ივნისს გარემოს დაცვის მსოფლიო დღე აღინიშნება.
როგორც „ნიუსპრესს“ გარემოს დაცვის სამინისტროდან აცნობეს, ამ დღესთან დაკავშირებით, საღამოს სხვადასხვა ღონისძიება გაიმართება.
სამინისტროს ინფორმაციით, მოსწავლე-ახალგაზრდობის ეროვნული სასახლის წინ მწვანე სცენა მოეწყობა. გარემოს დაცვის მინისტრი გოგა ხაჩიძე კი, „ჰანგ დრამზე“ დაუკრავს.
მწვანე სცენაზე მსოფლიოში ცნობილი  ცოცხალი მუსიკის ქუჩის შემსრულებელი „DUB FX“ წარმოდგენას გამართავს.
20:00 საათზე სასტუმრო „ჰოლიდეი ინნ“-ში ოფიციალური საზეიმო მიღება შედგება.
ღონისძიებაზე მიწვეულ სტუმრებს სიტყვით გარემოს დაცვის მინისტრი გოგა ხაჩიძე მიმართავს. სიტყვით გამოვლენ გაეროს მუდმივი წარმომადგენლის მოადგილე საქართველოში ინიტა პაულოვიჩა და სხვა მიწვეული სტუმრები.
გოგა ხაჩიძე გარემოსდაცვით სფეროში მრავალწლიანი აქტიური მონაწილეობისთვის „მწვანე ადამიანებს“ დააჯილდოებს. მიღებაზე ფოტოგამოფენა - საქართველოს ბიომრავალფეროვნება გაიხსნება.
წელს, გარემოს დაცვის მსოფლიო დღე 39-დ აღინიშნება. გარემოს დაცვის მსოფლიო დღის აღნიშვნა გარემოს შენარჩუნებისა და გაუმჯობესებისთვის ბრძოლაში საზოგადოების აქტიურ ჩაბმას ისახავს მიზნად.