გამოცდების ეროვნული ცენტრის ყოფილი თანამშრომლები განათლებისა და მეცნიერების მინისტრის დიმიტრი შაშკინისგან დაუყოვნებელ საჯარო განმარტებებს მოითხოვენ.
ცენტრის ყოფილი თანამშრომლები კატეგორიულად ითხოვენ -საზოგადოებას განუმარტონ რა აუცილებლობით იყო გამოწვეული მინისტრის გადაწყვეტილება შეფასებისა და გამოცდების ეროვნული ცენტრის დირექტორის გათავისუფლების თაობაზე და რატომ გაატარა მინისტრმა ფუნდამენტური საკადრო ცვლილება გამოცდების დროს.
ცენტრის ექს-თანამშრომლებმა ეს მოთხოვნა პრესკონფერენციაზე დააყენეს და შესაბამისი განცხადება გაავრცელეს.
მათი თქმით, თანამშრომლების მხრიდან სამსახურის დატოვება მინისტრის დაუსაბუთებელ და უპასუხისმგებლო გადაწყვეტილებაზე პასუხი და პრინციპული გადაწყვეტილებაა.
„ჩვენს მიერ სამსახურის დატოვება არ უკავშირდება რაიმე სახის პოლიტიკურ მოსაზრებებს. ჩვენთვის შეურაცხმყოფელი იქნება ამ ნაბიჯის მიღმა პოლიტკური მოტივების ძიება. მიუხედავად იმისა, რომ არაერთხელ მკაფიოდ გამოვხატეთ ჩვენი პოზიცია მინისტრის გადაწყვეტილებასთან დაკავშირებით, განვითარებულმა მოვლენებმა და გავრცელებულმა არაობიექტურმა ინფორმაციამ კიდევ ერთი განმარტების აუცილებლობა დაგვანახა“- განაცხადეს ცენტრის ყოფილმა თანამშრომლებმა და აღნიშნეს, რომ გამოცდების ეროვნული ცენტრი მუდამ ობიექტური იყო და კორუფციისგან თავისუფალ სისტემას ქმნიდა. მათივე თქმით, როგორც ჩანს, მინისტრის პოლიტიკა ამ პრინციპებთან შეუთავსებელი აღმოჩნდა.
ყოფილი თანამშრომლის ივა მინდაძის განმარტებით, ამის დასტურია განათლების მინისტრის მცდელობები - უხეშად ჩარეულიყო ცენტრის მუშაობაში. გამოცდების ეროვნული ცენტრი და მისი ხელმძღვანელი კი, მისივე განმარტებით, სწორედ ასეთ ფაქტებს ეწინააღმდეგებოდა.
,,ჩვენ საჯარო სივრცეში დავრჩით, მაგრამ საჯარო სამსახურს გარეთ. სანაცვლოდ, ახლა უკვე შეგვიძლია სამინისტროსთან განათლების პოლიტიკის საკითხებზე დისკუსია როგორც თანასწორის და არა როგორც დაქვემდებარებულის პოზიციიდან“- განაცხადეს ეროვნული ცენტრის თანამშრომლებმა და აღნიშნეს, რომ როგორც ცენტრის ექს-ხელმძღვანელი მაია მიმინოშვილი, ისინიც დაინტერესებული არიან ეროვნული გამოცდების შეუფერხებლად ჩატარებაში და შესაძლებლობის ფარგლებში, მზად არიან ხელი შეუწყონ ამ პროცესს.