გამოცდების ეროვნული ცენტრის ახალი ხელმძღვანელი ხატია დეკანოიძე გამოცდების ხარვეზების გარეშე ჩატარების პირობას დებს. ამის შესახებ   მან ახალ თანამდებობაზე წარდგენისას განაცხადა.

დეკანოიძის თქმით, შემოთავაზება გამოცდების ეროვნული ცენტრის ხელმძღვანელის პოსტზე მისთვის მოულოდნელი იყო.

მისი შეფასებით, მიუხედავად სფეროების განსხვავებისა, ორივე უწყება - შსს-ც და განათლების სამინისტროც, განსაკუთრებით სერიოზულ მიმართულებებს წარმოადგენენ.

დეკანოიძის თქმით, მან განათლების სისტემაში მანდატურის ინსტიტუტის დანერგვაში მონაწილეობა მიიღო, რაც ეამაყება.

დღესვე, დეკანოიძემ აღნიშნა, რომ წელს საქართველოში გამოცდები ზედმიწევნით კარგად და ხარვეზების გარეშე ჩატარდება.

,,მე ვიქნები სახელმწიფოს მხრიდან გარანტი იმისა, რომ არავითარი ხარვეზი გამოცდების მიმდინარეობის პერიოდში არ იქნება. ეს ეხება როგორც მისაღებ გამოცდებს, ასევე, სხვა ტიპის გამოცდებსაც“ - განაცხადა დეკანოიძემ და იქვე დასძინა, რომ რეფორმა ველოსიპედის ტარებას ჰგავს -როგორც კი შეჩერდები, გადმოვარდები.

მისი თქმით, გამოცდების ეროვნულ ცენტრში, იგი არაერთი სიახლის განხორციელებას აპირებს.


,,ჩემთან ერთად იქნებიან ჩემი გუნდის წარმომადგენლები, რომლებიც სიახლეების დანერგვაში დამეხმარებიან“-აღნიშნა მან.

რაც შეეხება საკადრო ცვლილებებს, დეკანოიძის თქმით, გამოცდების ეროვნული ცენტრის თანამშრომლებს სრული თავისუფლება აქვთ - ვისაც სურვილი ექნება, სამსახურში ყველა დარჩება.

გამოცდების ეროვნული ცენტრის ყოფილი ხელმძღვანელი მაია მიმინოშვილი თანამდებობიდან 28 მაისს გაათავისუფლეს. პროტესტის ნიშნად, სამსახური დატოვა ცენტრის 60-მდე თანამშრომელმა.

რაც შეეხება ხატია დეკანოიძეს, იგი დღემდე პოლიციის აკადემიის რექტორი იყო.