თბილისის მერია 27 მაისს, პოლიტიკური კოალიცია „ქართული ოცნების“ მიერ დაგეგმილი მანიფესტაციის დროს, თავისუფლების მოედანზე  სცენის დამონტაჟებაზე თანხმობას აცხადებს.
როგორც მუნიციპალიტეტის მიერ გავრცელებულ განცხადებაშია ნათქვამი, მერია 27 მაისის აქციასთან დაკავშირებით, არასამთავრობო ორგანიზაციების მხრიდან გაკეთებულ მოწოდებას ეხმიანება.
განცხადების თანახმად მერია აღიარებს რა საქართველოს კონსტიტუციითა და საერთაშორისო ნორმებით დაცულ მშვიდობიანი შეკრებისა და მანიფესტაციის უფლებას, თავად არ დაუშვებს ამ გარანტირებული უფლებების დაუსაბუთებელ და არაპროპორციულ შეზღუდვას.
„ამის დასტური იყო ზუსტად თბილისის მერიის მხრიდან აქციის ორგანიზატორების მოთხოვნაზე ოპერატიული რეაგირება და მათთვის უფლებამოსილი წარმომადგენლის გამოყოფა, რომელთანაც ერთად მათ აქციის ჩატარების ორგანიზაციული საკითხების განხილვის საშუალება მიეცათ“ - ნათქვამია განცხადებაში.
მერიის ინფორმაციით, მიმართვაში დასმულ პრობლემურ საკითხს, რომელიც გზის სავალ ნაწილზე სცენის განთავსებას შეეხება, მერიის წარმომადგენელმა აქციის ორგანიზატორებს „შეკრებებისა და მანიფესტაციების შესახებ“ საქართველოს კანონის მოთხოვნები განუმარტა, რომლებიც მათ შორის სხვათა უფლებების დასაცავად არის გათვალისწინებული და რომელთა დაცვა ორგანიზატორების მოვალეობაა.
„ამასთან, ვითვალისწინებდით რა ეუთოს დემოკრატიული ინსტიტუტებისა და ადამიანის უფლებათა ოფისის და ვენეციის კომისიის სახელმძღვანელო პრინციპებს, რომლის თანახმადაც, სახელმწიფო ვალდებულია აქციის ორგანიზატორებს გონივრული ალტერნატივა შესთავაზოს, ჩვენს მიერ მათ მიეთითათ, რომ სცენის მოწყობა შესაძლებელია თავისუფლების მოედანზე არსებულ ტროტუარზე, იმგვარად რომ ამ კონსტრუქციით გზის გადაკეტვა არ მომხდარიყო“ - აცხადებენ მერიაში.
განცხადების თანახმად, მიუხედავად იმისა, რომ პირისპირ შეხვედრისას აქციის ორგანიზატორების მხრიდან ამ საკითხებზე ამგვარი კრიტიკული პოზიციის დაფიქსირება არ მომხდარა, მერია თანხმობას აცხადებს ორგანიზატორების მიერ სცენის განთავსება მოხდეს მათ მიერ შემოთავაზებული ფორმით.
როგორც ცნობილია, „ქართულმა ოცნებამ“ არასამთავრობო ორგანიზაციებს აცნობა, რომ თბილისის მერიამ კოალიციას თავისუფლების მოედანზე დაგეგმილი ფართომასშტაბიანი მიტინგისთვის საჭირო სცენის მოსაწყობად უარი უთხრა.
არასამთავრობოების წარმომადგენლების ინფორმაციით, მერიის წარმომადგენელი მიიჩნევდა, რომ აქციის დაწყებამდე, თავისუფლების მოედანზე სცენის მოწყობას და შესაბამისი აპარატურის დამონტაჟებას შეიძლება ტრანსპორტის მოძრაობის შეფერხება გამოეწვია.