ნებისმიერი საკონსულო მომოსახურება, რომელიც უცხოეთიდან საქართველოში ნეშტის გადმოსვენებისას უნდა განხორციელდეს, საქართველოს მოქალაქეებისათვის უფასო გახდება.  ამის შესახებ დღეს ადამიანის უფლებათა დაცვის საპარლამენტო კომიტეტში საგარეო საქმეთა სამინისტროს იურიდიული დეპარტამენტის დირექტორმა ირაკლი ქოიავამ განაცხადა.

შესაბამისი ცვლილებების კანონპროექტი კომიტეტში პირველი მოსმენით განიხილეს.

„კანონი „საკონსულო მოსაკრებლის შესახებ” ითვალისწინებდა ნეშტის გადმოსვენების პროცედურისთვის საჭირო სხვადასხვა სახის დოკუმენტებზე მოსაკრებელს, თუმცა, ამ ცვლილებებით მოსაკრებლები მოქალაქეებისთვის უქმდება“ - აღნიშნა ქოიავამ.

ამასთანავე, ადგილსამყოფელ ქვეყანაში სიცოცხლისა და ჯანმრთელობისათვის საფრთხის შემცველი გარემოებების არსებობის შემთხვევაში, საქართველოს მოქალაქეები სამშობლოში დასაბრუნებელი მოწმობის გაფორმების მოსაკრებლისგან თავისუფლდებიან.