საქართველოს იუსტიციის სამინისტროს ეროვნული არქივისა და პოლონეთის სახელმწიფო არქივების ორგანიზებით დღეს, ვარშავაში, ღია ცის ქვეშ გამოფენა „საქართველო - წარსული და თანამედროვეობა“ გაიხსნა.
საქართველოს დამოუკიდებლობის დღისადმი მიძღვნილი ღონისძიება ეროვნული არქივის გენერალურმა დირექტორმა თეონა იაშვილმა, პოლონეთის სახელმწიფო არქივების ხელმძღვანელმა ვლადისლავ სტეპანიაკმა და საქართველოს ელჩმა პოლონეთში ნიკოლოზ ნიკოლოზიშვილმა გახსნეს.
როგორც „ნიუსპრესს“ ეროვნული არქივიდან აცნობეს, ექსპოზიციაზე წარმოდგენილია როგორც ისტორიული ფოტოები, რომლებიც საქართველოს ეროვნულ არქივშია დაცული, ისე საქართველოს ქალაქების, რეგიონების, კურორტების, ტრადიციების, ქართული ხელნაწერების, ხალხური ცეკვის, ეროვნული სამოსის, არქიტექტურის, ხუროთმოძღვრების ძეგლების, დღესასწაულებისა და თანამედროვე საქართველოს სხვა ღირშესანიშნაობების ამსახველი ფოტომასალა.
ექსპოზიცია დიმიტრი ერმაკოვის, ალექსანდრე როინაშვილის, ნიკოლოზ საღარაძის, ასევე, თანამედროვე ფოტოგრაფების - სერგო ედიშერაშვილის, გიორგი კვიჟინაძის, გოგა ჩანადირის, გიორგი მეურმიშვილის, გურამ წიბახაშვილის ფოტოებს მოიცავს.
გამოფენა, რომელიც ვარშავის ძველ უბანში, პრეზიდენტის სასახლის მიმდებარე ტერიტორიაზეა წარმოდგენილი, 26 მაისამდე გაგრძელდება.