კულტურისა და ძეგლთა დაცვის მინისტრმა ნიკოლოზ რურუამ დღეს ლიტერატურული ფორუმ-დიალოგი გახსნა.
როგორც „ნიუსპრესს“ კულტურის სამინისტროდან აცნობეს, რიგით მეორე ლიტერატურული ფორუმ-დიალოგი ქართველი და უცხოელი გამომცემლების, მთარგმნელებისა და მწერლებისთვის, 22-23 მაისს, თბილისის XIV წიგნის საერთაშორისო ფესტივალის ფარგლებში ტარდება.
ფორუმ-დიალოგში მონაწილეობის მისაღებად თბილისს 17 უცხოელი სტუმარი ეწვია. საპატიო სტუმრის რანგში ლიტერატურულ ფორუმ-დიალოგს ფრანქფურტის წიგნის ბაზრობის ვიცე-პრეზიდენტი ტობიას ვოსი დაესწრება, რომელიც ქართველ გამომცემლებთან შეხვედრებს გამართავს.
ფორუმ-დიალოგის მიზანი უცხოური და ქართული ლიტერატურის პოპულარიზაციაა.
ფორუმის ფარგლებში, საგამომცემლო და ლიტერატურულ სფეროში პრეზენტაციები და დისკუსიები გაიმართება.
24 მაისს თბილისის XIV წიგნის საერთაშორისო ფესტივალზე უცხოელი სტუმრების ვიზიტი იგეგმება.