გეოფიზიკის ინსტიტუტის შენობაში ასოციაცია ,,სტუდია რეს“ თანამშრომლებს არ უშვებენ.
როგორც ჟურნალისტებს ,,სტუდია რეს“ დირექტორმა მამუკა ყუფარაძემ განუცხადა, აღნიშნულ შენობაში სამწლიანი იჯარით აქვს ფართი აღებული.  თუმცა, მას და მის თოთხმეტ თანამშრომელს კერძო დაცვის კომპანია ,,მგლების“ წარმომადგენლები შენობაში შესვლის საშუალებას არ აძლევენ.
„კუთვნილ ფართში ვერ შევდივართ. მოვიტანე საჯარო რეგისტრაციის მოწმობა, თანამშრომლების სია, თუმცა, დაცვის თანამშრომლები მეუბნებიან, რომ ბრძანება აქვთ არავინ შეუშვან. ასევე, მიცხადებენ სამი საათისთვის ჩვენი უფროსი მოვა და ის შეგიშვებთო“ - განაცხადა ყუფარაძემ.
მამუკა ყუფარაძეს თქმით, მან საპატრულო პოლიცია ორჯერ გამოიძახა, თუმცა, პოლიციაში ურჩიეს, რომ ეს საკითხი უშუალოდ დაცვასთან გაერკვია.
,,გაოცებული ვარ ასეთი პასუხით. ახლა მივდივარ პოლიციის საბურთალოს განყოფილებაში, რომ დავწერო განცხადება და მიპასუხონ თუ რატომ არ ეხება საპატრულო პოლიციას ის ფაქტი, რომ ჩვენს კუთვნილ ფართში ვერ შევდივართ“ - განაცხადა მამუკა ყუფარაძემ.
ასევე, გეოფიზიკის ინსტიტუტში შესვლას ვერ ახერხებდა გეოგრაფიის ინსტიტუტის ათამდე თანამშრომელიც. თუმცა, რამდენიმე წუთის წინ ისინი შენობაში შეუშვეს.
რაც შეეხება ამავე შენობაში განთავსებული ტელეკომპანიების ,,პირველი სტერეოსა“ და ,,სტერეო პლიუსის“ თანამშრომლებს, ისინი კუთვნილ ოფისში შესვლას და მუშაობის გაგრძელებას ამ დრომდე ითხოვენ.
რამდენიმე დღის წინ, „პირველი სტერეოს“ შენობაში მისი ახალი დირექტორის და თანამფლობელის ვასილ კობაიძის მიერ დაქირავებული კერძო დაცვის კომპანიის თანამშრომლები შევიდნენ, შენობა დაიკავეს და გეოფიზიკის ინსტიტუტში შესვლის საკითხს ისინი აკონტროლებენ.