საზოგადოებრივი ორგანიზაცია „თბილისის ჰამქარი“ კომპანია „ირაო მაგნატ გუდიაშვილს“ სასამართლოში უჩივლებს.

როგორც „ნიუსპრესს“ „თბილისის ჰამქარის“ ხელმძღვანელმა ალეკო ელისაშვილმა განუცხადა, სარჩელს კომპანიის წინააღმდეგ დღეს შეიტანენ.

ელისაშვილის თქმით, კომპანიამ მოედანზე მდებარე „ლიტერატურული საქართველოს“ შენობა ნაწილობრივ დაანგრია, თუმცა, ამის არანაიარი ნებართვა არ ჰქონდა. მისივე განმარტებით, კომპანიამ კულტურული მემკვიდრეობის ძეგლი დააზიანა და ამისთვის პასუხი უნდა აგოს.

„რაც მათ გააკეთეს, სრული უკანონობაა. ერთადერთი, რის ნებართვასაც ჩვენ მათ მივცემთ, ისაა, რომ გადახურონ სახურავი, რომელიც შენობას გუშინ გადახადეს“-აღნიშნა მან და დასძინა, რომ „ირაო მაგნატ გუდიაშვილის“ წარმომადგენლისგან „ლიტერატურული საქართველოს“ შენობის გადახურვის პირობა მიიღო.

ელისაშვილის თქმით, „თბილისის ჰამქარი“ საგანგებო წერილით თბილისის ზედამხედველობის სამსახურსაც მიმართავს და აღნიშნული შენობის მიმართ ყურადღებას მოითხოვს.

ორგანიზაციამ აქცია გუდიაშვილის მოედანზე გუშინ გამართა. გუშინვე, კომპანია „ირაო მაგნატ გუდიაშვილმა“ სპეციალური განცხადება გაავრცელა, სადაც აღნიშნავს, რომ შენობის დემონტაჟი დაწყებული არ არის და ამჟამად, მხოლოდ კვლევისთვის საჭირო სამუშაოები მიმდინარეობს.