რუსთაველის გამზირზე არატრადიციული სექსუალური ორიენტაციის მქონე პირების აქციის რამდენიმე მონაწილე დააკავეს.
ფილარმონიასთან არატრადიციული სექსუალური ორიენტაციის მქონე პირებმა, უფლება დამცველებმა და ეწ „LGBT“ ჯგუფის წევრებმა ჰომოფობიის წინააღმდეგ ბრძოლის საერთაშორისო დღესთან დაკავშირებით, დღეს აქცია გამართეს და თავისუფლების მოედნისკენ მსვლელობა მოაწყვეს.
აქცია ლოზუნგით - „ჰომოსექსუალობა ავადმყოფობა არ არის“ გაიმართა.
მსვლელობის პროცესში, მეცნიერებათა აკადემიის მიმდებარე ტერიტორიაზე აქციის მონაწილეებს ახალგაზრდების ჯგუფი გადაუდგა წინ და მათ შორის ჯერ სიტყვიერი, შემდეგ კი - ფიზიკური დაპირისპირება მოხდა. ადგილზე საპატრულო პოლიციის წარმომადგენლები მივიდნენ და დაპირისპირების მონაწილეები დააკავეს. გარკვეული დროის შემდეგ მათი ნაწილი გაათავისუფლეს.
აქცია ამ წუთებში რუსთაველის გამზირზე, მეცნიერებათა აკადემიის წინ მიმდინარეობს.
ტერიტორიაზე სასულიერო პირები მივიდნენ. ერთ-ერთი მოძღვრის, მამა დავითის განცხადებით, დაუშველებელია მსგავსი ქმედების პროპაგანდირება, ვინაიდან ეს სოდომ-გომორის ცოდვაა და ამის მონაწილე ადამიანები ჯოჯოხეთისთვის არიან განწირული. ამის მიუხედავად, მათ ეკლესიის წიაღში შესვლისკენ მოუწოდებენ.
მისი განცხადებით, ეკლესია ამ ადამიანების საქმეში არ ერევა, თუმცა, ქუჩაში მსგავსი სახით გამოსვლას და ამის პროპაგანდას ეწინააღმდეგება.
მოძღვარი არ გამორიცხავს, რომ ეს ქმედება დავით გარეჯის ირგვლივ შექმნილი მდგომარეობის გადასაფარად იყოს მოწყობილი.