საბუნებისმეტყველო საგნების ექპერიმენტულ ნაწილში პედაგოგთა სასერტიფიკაციო გამოცდების შედეგები ცნობილია.
როგორც განათლების სამინისტროში განაცხადეს, მიუხედავად იმისა, რომ წელს საბუნებისმეტყველო საგნების ექსპერიმენტულ ნაწილში გამოცდა პირველად ჩატარდა, მასწავლებელთა უპრეცედენტო რაოდენობამ გადალახა ბარიერი და მაღალი შედეგები აჩვენა. კერძოდ, ბიოლოგიაში ექსპერიმენტული ნაწილი პედაგოგთა 90%-მა ჩააბარა, ფიზიკაში-83%-მა, ხოლო ქიმიაში-74%-მა.
განათლების სამინისტროში მიიჩნევენ, რომ პედაგოგებს მხოლოდ ის ცოდნა მოეთხოვებოდათ, რაც აუცილებელია თანამედროვე „აინშტაინის ლაბორატორიაში“ პრაქტიკული მეცადინეობების მაღალ დონეზე წარმართვისთვის, ხოლო გამოცდების მაღალი შედეგები მასწავლებელთა პროფესიული განვითარების ეროვნული ცენტრის მიერ ორგანიზებულმა ტრენინგებმა განაპირობა.

ბიოლოგიის, ქიმიისა და ფიზიკის ექსპერიმენტულ ნაწილში გამოცდების ჩაბარების შემდეგ, ყველა პედაგოგი ხელფასზე დანამატის სახით 75 ლარს მიიღებს.

სერტიფიცირებულ მასწავლებელთა სახელფასო სქემა ასეთია - სერტიფიცირების დანამატი 75 ლარი, დამატებით ინგლისური ენისა და კომპიუტერის გამოცდის ჩაბარების შემთხევავში - 200 ლარი. იმ პედაგოგებს, რომლებიც ინგლისურისა და კომპიუტერის გამოცდის ჩაბარების შედეგად, საუკეთესო 25%-ში მოხვდებიან, ხელფასი 1000 ლარი ექნებათ.