2011-2012 სასწავლო წლის გამოსაშვები გამოცდები 21 მაისს იწყება.
გამოცდებთან დაკავშირებული საკითხების განსახილველად განათლებისა და მეცნიერების მინისტრი დიმიტრი შაშკინი სამინისტროს განათლების მართვის საინფორმაციო სისტემის წარმომადგენლებს შეხვდა.
საატესტატო გამოცდებს აღნიშნული სისტემა უზრუნველყოფს ტექნიკურად. სამუშაო შეხვედრაზე შესრულებული და მომავალში დაგეგმილ სამუშაოებზე იმსჯელეს.
2011-2012 სასწავლო წლის საატესტატო გამოცდები წელს „CAT“-ის ტიპის საგამოცდო მოდელით ჩატარდება. სიახლეა საატესტატო გამოცდების ტექნიკური უზნუნველყოფის კუთხით. წელს პირველად, გამოცდები ახალი School Box-ების სისტემის გამოყენებით ჩატარდება. School Box თანამედროვე სისტემაა, რომელიც სტაბილურ და უსაფრთხო ინტერნეტკავშირს უზრუნველყოფს და სკოლებს დამატებითი ელექტრონული სერვისების განხორციელებაში დაეხმარება.
როგორც განათლების სამინისტროში განაცხადეს, ტექნიკურად ყველა სკოლა გამართულია და გამოცდების ჩასატარებლად მზადაა. კომპიუტერული ინფრასტრუქტურის ზედამხედველობასა და ტექნიკურ გამართულობას კონკურსის წესით შერჩეული IT სპეციალისტები უზუნველყოფენ.