ქართული საბრძოლო ხელოვნების - „შავფაროსნების“ წევრები დღეს დავით გარეჯის სამონასტრო კომპლექსში გაემგზავრებიან.
როგორც „ნიუსპრესს“ „შავფაროსნების“ ფედერაციის პრეზიდენტმა ირაკლი ქოქოსაძემ განუცხადა, მათი მიზანი დავით გარეჯში არსებული ვითარების ადგილზე შესწავლაა.
მისი თქმით, აღნიშნულ საკითხებზე საპროტესტო აქციები იგეგმება და „შავფაროსნები“ აქციაში მონაწილეობას მას შემდეგ მიიღებენ, რაც დავით გარეჯის სამონასტრო კომპლექსის ირგვლივ შექმნილ ვითარებაში პირადად დარწმუნდებიან.
„ჩვენი სამოქმედო გეგმის პირევლი ეტაპი ადგილზე ჩასვლაა, სასულიერო პირებს დაველაპარაკებით და იმ ტერიტორიაზე შესვლას შევეცდებით, რომელზეც ამბობენ რომ არავის უშვებენ. ამის შემდეგ მივიღებთ გადაწყვეტილებას. გვინდა ადგილზე გავეცნოთ რა სიტუაციაა და ჩვენი პოზიცია დავაფიქსიროთ“- განუცხადა „ნიუსპრესს“ ქოქოსაძემ.
„შავფაროსნებთან“ ერთად დავით გარეჯში რიგითი მოქალაქეებიც გაემგზავრებიან. 100 კაციანი ჯგუფის შეკრება ქართული საბრძოლო ხელოვნების წარმომადგენლებმა სოციალური ქსელ „ფეისბუქის“ საშუალებით მოახერხეს.
რამდენიმე დღის წინ გავრცელდა ინფორმაცია, რომ გარეჯის უდაბნოს მონასტერში აზერბაიჯანელი მესაზღვრეები მომლოცველებსა და ტურისტებს არ უშვებენ.