სახალხო დამცველი სასჯელაღსრულების, პრობაციისა და იურიდიული დახმარების საკითხთა მინისტრის 7 მაისის ბრძანებას,  რომელიც პენიტენციარულ დაწესებულებებში ლიმიტის 1 724 ადგილით გაზრდას ეხება, უკან გადადგმული ნაბიჯის შეფასებას აძლევს.

ბრძანების თანახმად, სასჯელაღსრულების დაწესებულებებში ადგილების საერთო რაოდენობა 25 354 გახდება.

„მინისტრის ბრძანებამ, პრაქტიკულად, ფორმალურად შენიღბა გადატვირთულობა. მიმაჩნია, რომ გადატვირთულობასთან ბრძოლა დაწესებულებების ლიმიტების ფორმალური ზრდით დაუშვებელია და ეს პრობლემას ვერ მოაგვარებს“-განაცხადა გიორგი ტუღუშმა.

ომბუდსმენი მიიჩნევს, რომ ბოლო დროს სასჯელაღსრულების დაწესებულებებში განხორციელებული ვერანაირი ცვლილება ვერ განაპირობებს ლიმიტის ზრდის მართებულობას.
„საყურადღებოა, რომ ამჟამინდელი ლიმიტი, რომელიც 17 დაწესებულებაზე იყო განსაზღვრული, 704-ით მეტია, რაც თავისთავად აღნიშნული ცვლილების უარყოფით ხასიათზე მიუთითებს“-განაცხადა ტუღუშმა და აღნიშნა, რომ გაზრდილი ლიმიტების ფარგლებში, დაწესებულებების უმეტეს ნაწილში პატიმრები კანონმდებლობით გათვალისწინებული საცხოვრებელი ფართით ვეღარ ისარგებლებენ.
სახალხო დამცველის განცხადებით, მან სასჯელაღსრულების დაწესებულებების გადატვირთულობის პრობლემის გადაჭრის მიზნით, არაერთი რეკომენდაციით მიმართა შესაბამის უწყებებს, რადგან მიაჩნია, რომ ამისთვის აუცილებელია კომპლექსური ღონისძიებების გატარება, მათ შორის სისხლის სამართლებრივი პოლიტიკის გადახედვა და ალტერნატიული სასჯელის ზომების აქტიური გამოყენება.