ჯავახიშვილის სახელობის თბილისის სახელმწიფო უნივერსიტეტის მეორე კორპუსის წინ სტუდენტთა საპროტესტო აქციის მონაწილეები განათლებისა და მეცნიერების სამინისტროს მიმართულებით დაიძრნენ.

თსუ-სთან გამართულ აქციაზე სტუდენტებმა თვითმმართველობის მხრიდან შექმნილი დაბრკოლებები გააპროტესტეს და განაცხადეს, რომ დამოუკიდებელ კანდიდატებს, რომლებიც უნივერსიტეტის თვითმმართველობის არჩევნებში მონაწილეობას აპირებდნენ, გაურკვეველი მიზეზების გამო უარი უთხრეს, ხოლო სტუდენტური ორგანიზაცია „სტუდენტური ხმა“ საერთოდ არ დაარეგისტრირეს.

„სახელისუფლებო მოძრაობა, ამ შემთხვევაში თვითმმართველობა, ყველანაირად ზღუდავს სტუდენტთა უფლებებს. ჩვენ ამას არ დავუშვებთ, ამიტომ, ვეწინააღმდეგებით უნივერსიტეტში დაგეგმილ თვითმმართველობის არჩევნებს და გამოვდივართ დევიზით - „უნივერსიტეტი თვითმმართველობის გარეშე“ - განუცხადა „ნიუსპრესს“ საინიციატივო ჯგუფის წევრმა ალექსანდრე კობაიძემ.

სტუდენტური თვითმმართველობის არჩევნები 18 მაისს იგეგმება. მასში მონაწილოებას „ერთიანი სტუდენტური მოძრაობა“ და დამოუკიდებელი კანდიდატები მიიღებენ.