თბილისის საკრებულოს „ქრისტიან-დემოკრატი“ წევრი ზაზა გაბუნია ავარიული შენობების პრობლემის გადასაჭრელად პრევენციული ღონისძიებების დაუყოვნებელ გატარებას მოითხოვს.
როგორც გაბუნიამ დღეს თბილისის საკრებულოში გამართულ პრესკონფერენციაზე აღნიშნა, ბუნებრივი კატაკლიზმების დროს ავარიული შენობები განსაკუთრებული საფრთხის ქვეშაა.
მისი განცხადებით, დედაქალაქში ათობით მე-2 და მე-3 კატეგორიის ავარიული შენობაა. ბუხაიძის ქუჩაზე ჩამონგრეული შენობა მე-3 კატეგორიას მიეკუთვნებოდა და საშიშროებას ქმნიდა.
„მეტეხის #14-ში მდებარე შენობისკენ ხელისუფლების ყურადღება ვერ მივმართე. ის უმძიმესი შენობაა და საცხოვრებლად საშიშია. შენობის დაბზარულ კედლებს მოსახლეობა საკუთარი საყოფაცხოვრებო ნივთებით ამაგრებს“ - აღნიშნა გაბუნიამ.
მისი თქმით, მსგავსი შენობებიდან მოსახლეობა დაუყოვნებლივ გამოსაყვანია.
„მოსახლეობა გამოსვლაზე თანახმაა, მაგრამ მერიის მხრიდან შეთავაზება იმდენად არაადეკვატურია, რომ ისინი ისევ იქ დარჩენას ამჯობინებენ“- განაცხადა ზაზა გაბუნიამ.
მისივე განმარტებით, ძველი თბილისის გამგეობის ქმედითუნარიანობა მსჯელობის საგანი უნდა გახდეს, რადგან ავარიული შენობების მიმართ მათი პოლიტიკა უცვლელია.