საქართველოში რიგით მერვე საერთაშორისო კონკურსი „ალიანტე“ დაიწყო.

ამის შესახებ ჟურნალისტებს თავდაცვის სამინისტროს საერთაშორისო ურთიერთობებისა და ევროატლანტიკური ინტეგრაციის დეპარტამენტის უფროსმა ირაკლი ყოჩაშვილმა, ნატოსა და ევროკავშირის შესახებ საინფორმაციო ცენტრის დირექტორმა ელენე გოცაძემ და კონკურს „ალიანტეს“ კოორდინატორმა ნათია ცვარიანმა აცნობეს.

პროექტის მიზანი ახალგაზრდებში ევროატლანტიკური ალიანსის შესახებ ცნობიერების ამაღლებაა.

თავდაცვის სამინისტროს პრესსამსაურის ინფორმაციით, „ალიანტე“ 15-დან 19 წლამდე ასაკის ახალგაზრდებისგან შემდგარი გუნდების კონკურსია, რომელიც სკოლის მოსწავლეებსა და სტუდენტებზეა გათვლილი. კონკურსი 4 რაუნდად განხორციელდება.

I და II რაუნდი ზოგად ცოდნაზე დაფუძნებული კითხვებისგან შედგება. გამარჯვებული გუნდები ეროვნულ ფინალში ერთმანეთს ფიზიკურ გამძლეობასა და სხვადასხვა დაბრკოლებების გადალახვაში შეეჯიბრებიან.

ეროვნულ ფინალს საქართველო უმასპინძლებს, საერთაშორისო ფინალი კი ლიტვაში გაიმართება. ფინალში გამარჯვებული 5 გუნდი საქართველოს სხვადასხვა კუთხეს მოინახულებს.

კონკურსს არასამთავრობო ორგანიზაცია „საქართველოს ახალგაზრდულ ორგანიზაციათა ნაციონალური საბჭო“ ახორციელებს. პროექტის საერთაშორისო მხარდამჭერები ჩეხეთის საგარეო საქმეთა სამინისტრო, ლიტვისა და საქართველოს თავდაცვის სამინისტროები და ნატოსა და ევროკავშირის შესახებ საინფორმაციო ცენტრები არიან.

თავდაცვის სამინისტროს ინფორმაციით, „ალიანტე“ უკვე 14 წელია ტარდება, საქართველო კონკურსს 2008 წელს შეუერთდა. მასში ყოველწლიურად ათასობით ქართველი ახალგაზრდა მონაწილეობს.