სტუდენტების დაზღვევასთან დაკავშირებულ პრეზიდენტის ინიციატივაზე დღეს, პრეზიდენტის პრესსპიკერმა მანანა მანჯგალაძემ სამშაბათის ტრადიციულ ბრიფინგზე განმარტებები გააკეთა.  

მისი თქმით, პრეზიდენტმა აღნიშნა, რომ იმ პირობებში, როცა ქვეყანაში ახალი კლინიკები იხსნება, განსაკუთრებით მნიშვნელოვანია ჯანდაცვა ყველასთვის ხელმისაწვდომი იყოს. შესაბამისად, წარმოდგენილია ყველა სტუდენტის სადაზღვევო ქსელში ჩართვის ინიციატივა.

მანჯგალაძის განმარტებით, დღეისთვის სტუდენტთა რაოდენობა 100 000-ს შეადგენს. ასევე, სექტემბრიდან დაეზღვევა ყველა ასაკის პენსიონერი და 5 წლამდე ასაკის ბავშვი.

„ეს არის კიდევ ერთი ნაბიჯი იმ მიზნისკენ, რომლის თაობაზეც პრეზიდენტმა ისაუბრა ბათუმში და რომლის მიზანია - ჯანდაცვა ყველას“ - აღნიშნა მანჯგალაძემ.

მისი თქმით, ეს ინიციატივა ეტაპობრივად საქართველოს ყველა მოქალაქეს შეეხება.