ტელეკომპანია „კავკასიის“ შენობასთან „მართლმადიდებელ მშობელთა კავშირის“ ორგანიზებით აქცია გაიმართა.
აქციაზე კავშირის წევრებმა, მღვდელმსახურებმა და საზოგადოების  სხვა წარმომადგენლებმა 2 წლის წინ, „კავკასიაში“ მომხდარი ინციდენტის დროს დაპატიმრებულთა გათავისუფლება მოითხოვეს.

ტელეკომპანიასთან მღვდელმსახურებმა დაკავებულების სახელზე წმინდა გიორგისადმი სავედრებელი პარაკლისი ჩაატარეს.

როგორც „ნიუსპრესს“ კავშირის თანათავმჯდომარემ ავთანდილ უნგიაძემ განუცხადა, მათ „კავკასიის“ მიმართ პრეტენზია არ აქვთ და ეს ადგილი 2 წლის წინ, აქ განვითარებული მოვლენების გამო შეირჩა. მისივე განმარტებით, შეკრებილებმა დღეს საზოგადოებას კიდევ ერთხელ შეახსენეს ქვეყანაში სარწმუნოების პატიმრების არსებობის შესახებ.

უნგიაძის თქმით, საზოგადოებამ ხმა უნდა აიმაღლოს, რათა ხელისუფლებამ უკანონოდ დაკავებულები გაათავისუფლოს.

აქციის მონაწილეებთან შესახვედრად „კავკასიის“ დირექტორი დავით აქუბარდია გამოვიდა.

ტელეკომპანიის შენობასთან მისვლამდე აქციის მონაწილეები ილიას სახელმწიფო უნივერსიტეტთან იმყოფებოდნენ, სადაც მათ საპროტესტო აქცია გამართეს და განაცხადეს, რომ აღნიშნული უნივერსიტეტი ეროვნული და რელიგიური ღირებულებების წინააღმდეგ მიზანმიმართულ პროპაგანდას უწყობდა ხელს.

აქციის ორგანიზატორები მსგავსი ღონისძიებების გამართვას მომავალშიც აპირებენ.

2010 წლის 7 მაისს „კავკასიის“ გადაცემაში „ბარიერი“ მწერალ ერეკლე დეისაძის წიგნის „საიდუმლო სირობის“ განხილვისას მის მომხრე- მოწინააღმდეგეებს შორის დისკუსია სიტყვიერ და ფიზიკურ დაპირისპირებაში გადაიზარდა. სიტუაცია საპატრულო პოლიციამ განმუხტა და ინციდენტის 8 მონაწილე დააკავა. მათ ხულიგნობისა და ჟურნალისტური საქმიანობისთვის ხელის შეშლის ბრალდებით 4-დან 7 წლამდე თავისუფლების აღკვეთა მიესაჯა.