18-ე სამკურნალო დაწესებულებაში პატიმარ ზურაბ დელიანიძის გარდაცვალების ფაქტთან დაკავშირებით დღეს, პარლამენტის შენობის წინ საპროტესტო აქცია გაიმართება.
აქცია რიგითი მოქალაქეების მიერ სოციალური ქსელის მეშვეობით დაიგეგმა.
როგორც „ნიუსპრესს“ „სამოქალაქო სოლიდარობის კამპანიისა“ და ახალგაზრდა იურისტთა ასოციაციის წარმომადგენლებმა განუცხადეს, დღევანდელ აქციას ისინიც შეუერთდებიან.
„დღეს კიდევ ერთხელ მოვითხოვთ სასჯელაღსრულების, პრობაციისა და იურიდიული დახმარების მინისტრის ხათუნა კალმახელიძის ჩვენთან შეხვედრას და დელიანიძის გარდაცვალების გარემოებებთან დაკავშირებით გაჩენილ კითხვებზე ოფიციალური პასუხის გაცემას“ - განუცხადა „ნიუსპრესს“ „სამოქალაქო სოლიდარობის კამპანიის“ წევრმა შორენა შავერდაშვილმა.
მისივე თქმით, დღევანდელ აქციაზე სასჯელაღსრულების დაწესებულებებში პატიმართა დაღუპვის გახშირებულ ფაქტებზე პროტესტს გამოვთქვამთ და სამინისტროსგან რეაგირებას მოვითხოვთ.

კალმახელიძესთან შეხვედრის მოთხოვნით, „სამოქალაქო სოლიდარობის კამპანიის“ ორგანიზებით, გუშინ სამინისტროსთან აქცია გაიმართა. აქციაზე შეკრებილი არასამთავრობო ორგანიზაციების, მედიისა და სამოქალაქო საზოგადოების წარმომადგენლები კალმახელიძესთან შეხვედრას ითხოვდნენ, თუმცა, მინისტრი მათ არ შეხვდა.

გარდაცვლილი პატიმრის ზურაბ დელიანიძის ფოტოები სოციალურ ქსელში 3 მაისს გავრცელდა. მას სხეულზე დაზიანებები აღენიშნება.