სახალხო დამცველმა ქუთაისის ოპერისა და ბალეტის თეტრში ,,ნაციონალური მოძრაობის“ აქტივისტების შეხვედრაზე ჟურნალისტ ირაკლი ვაჩიბერაძის ცემის ფაქტის შესწავლა დაიწყო.
ომბუდსმენის აპარატის პრესსამსახურის ინფორმაციით, ომბუდსმენმა აღნიშნული ფაქტის შესწავლა უკვე დაიწყო, კერძოდ, სახალხო დამცველის დასავლეთის რეგიონული სამმართველოს წარმომადგენლები შეხვდნენ და ახსნა-განმარტებები ჩამოართვეს ჟურნალისტებს ნოდარ ჯოჯუას, თორნიკე ხურციძეს, ალეკო გვეტაძეს და თავად ირაკლი ვაჩიბერაძეს.
ომბუდსმენის აპარატის განცხადებით, სახალხო დამცველი ახსნა-განმარტებებისა და საქმის ირგვლივ შეკრებილი მასალის შესწავლის შემდეგ, შესაბამის რეაგირებას მოახდენს.
დღეს გავრცელებული ინფორმაციის თანახმად, ადგილობრივი თვითმმართველობისა და ,,ნაციონალური მოძრაობის“ აქტივისტებთან შეხვედრაზე, ქუთაისის ოპერისა და ბალეტის თეატრში არ დაუშვეს ადგილობრივი გაზეთის ,,P.S.“-ის ჟურნალისტი ირაკლი ვაჩიბერაძე. მისი განცხადებით, ის ოთხმა უცნობმა სამოქალაქო ფორმაში ჩაცმულმა პირმა სცემა და დიქტოფონი წაართვა, რომელიც მოგვიანებით დაუბრუნეს.
აპარატის ინფორმაციით, სახალხო დამცველი ქუთაისში 2 მაისს მომხდარ კიდევ ერთ ინციდენტს სწავლობს - გავრცელებული ინფორმაციით, ქუთაისობასთან დაკავშირებით ლადო მესხიშვილის თეატრში გამართულ ღონისძიებაზე მედია საშუალებების ნაწილი არ შეუშვეს.