ერთწლიანი კვლევითი პროექტის „ვიზის ფასილიტაცია და რეადმისია - უვიზო მიმოსვლის პერსპექტივები“ დასკვნითი ანგარიშის  პრეზენტაცია დღეს სასტუმრო „თბილისი მერიოტში“ გაიმართება.
კვლევა საქართველოსა და ევროკავშირს შორის 2011 წლის 1 მარტს ამოქმედებული ვიზის ფასილიტაციისა და რეადმისიის ხელშეკრულებების რეალობაში დანერგვის პროცესს და ევროკავშირთან უვიზო მიმოსვლის პერსპექტივებს მიმოიხილავს.
ფასილიტაციისა და რეადმისიის ხელშეკრულებების პირობების განხორციელება საქართველოსთვის ევროკავშირის სავიზო რეჟიმის ლიბერალიზაციისთვის აუცილებელი წინაპირობაა.
ანგარიში საქართველოდან ემიგრაციის ტენდენციებს, არალეგალური შრომითი მიგრაციის მარშრუტებს, ფულადი გზავნილების დინამიკასა და საქართველოსა და რეგიონის სავიზო სტატისტიკასაც ასახავს.
ღონისძიებას სამოქალაქო სექტორის, ხელისუფლების, მედიისა და საერთაშორისო ორგანიზაციების წარმომადგენლები დაესწრებიან. პრეზენტაციის შემდეგ დისკუსია გაიმართება.
პროექტი ფონდ „ღია საზოგადოება - საქართველოს“ მხარდაჭერით განხორციელდა.