პოლიტიკური და საზოგადო მოღვაწის მიხეილ (მიხაკო) წერეთლის ნეშტის საფრანგეთიდან გადმოსვენებასთან დაკავშირებით შექმნილი  კომისიის პირველი სხდომა დღეს, სახელმწიფო კანცელარიის მთავრობის სხდომათა დარბაზში გაიმართება.
ქვეყნის დამოუკიდებლობისთვის მებრძოლი მიხეილ წერეთლის ნეშტის ლევილის სასაფლაოდან საქართველოში გადმოსვენების საკითხზე, საქართველოს მთავრობის განკარგულებით, სპეციალური კომისია მუშაობს, რომელსაც დიასპორის საკითხებში სახელმწიფო მინისტრი პაპუნა დავითაია ხელმძღვანელობს. კომისიაში შედიან მიხაკო წერეთლის ნათესავებიც.
მიხაკო წერეთელმა საქართველო ბოლშევიკური რუსეთის მიერ ოკუპაციის შემდეგ დატოვა. იგი სამეცნიერო მუშაობას ეწეოდა ევროპის სხვადასხვა უნივერსიტეტში, მისი სტატიები და ნაშრომები მსოფლიოს წამყვან ჟურნალ-გაზეთებში ქვეყნდებოდა. მიხაკო წერეთელი პოლიტიკური ორგანიზაცია ,,თეთრი გიორგის“ ერთ-ერთი დამფუძნებელიც იყო.