იუსტიციის სამინისტროს საჯარო რეესტრის თავმჯდომარემ სოსო წიქარიშვილმა ისანი-სამგორის რაიონის გამგეობას დამისამართების პროექტის  ფარგლებში ინვენტარიზაციის შედეგად მოპოვებული მონაცემები გადასცა.
როგორც "ნიუსპრესს" იუსტიციის სამინისტროდან აცნობეს, მონაცემებში მტკვრის მარცხენა და მარჯვენა სანაპიროს დასრულებული არეალის ელექტრონული რუკა, სქემატური ნახაზები და გეომონაცემთა ბაზა იგულისხმება.
თბილისის დამისამართების პროექტის ფარგლებში, საჯარო რეესტრის ოპერატორების მიერ ისანი-სამგორის რაიონში მდებარე ყველა ქუჩა აღიწერა, დაინომრა ყველა სახლი და ბინა.
საჯარო რეესტრის მიერ ჩატარებული ინვენტარიზაციის დასრულების შემდეგ, სამოქალაქო რეესტრის სააგენტო ახლად შექმნილ მისამრთებზე არსებულ საცხოვრებლებში რეგისტრირებულ პირთა იდენტიფიცირებას მოახდენს.
სამოქალაქო რეესტრი სამუშაოებს მთელი ქვეყნის მასშტაბით, 9 რეგიონში შეასრულებს, რაც საერთო ჯამში, თბილისის გარდა, 270 სოფლის ტიპის დასახლებას მოიცავს.
დამისამართების პროექტის ფარგლებში, საჯარო და სამოქალაქო რეესტრების ბაზებში ასახული ცვლილებების მიუხედავად, მოქალაქეებს დოკუმენტაციის ხელახლა აღება არ მოუწევთ.
სამისამართო სისტემის შექმნის პროექტით, საქართველოს ყველა დაბისა თუ სოფლის სავალ ნაწილს საკუთარი სახელწოდება ექნება, შენობები კი დაინომრება.