სწავლის საფასურის გადაუხდელობის გამო სტატუსშეჩერებული სტუდენტებისთვის სტატუსის აღდგენის მოთხოვნით ხვალ საპროტესტო აქცია გაიმართება.
როგორც „ნიუსპრესს“ სტუდენტთა საინიციატივო ჯგუფის და „დემოკრატიული მოძრაობა - ერთიანი საქართველოს“ ახალგაზრდული ფრთის წევრმა გიორგი გვიმრაძემ განუცხადა, აქცია ტექნიკური უნივერსიტეტის მე-6 კორპუსთან გაიმართება.
გიორგი გვიმრაძის განმარტებით, ხვალინდელ აქციას ინფორმაციული ხასიათი ექნება და ის ერთგვარი მზადება იქნება უფრო მასშტაბური აქციისთვის.
აქციაზე სტუდენტები სწავლის გადასახადის შემცირებასაც მოითხოვენ.
სტუდენტების პრობლემების გადაჭრის მიზნით საინიციატივო ჯგუფი ორი თვის წინ შეიქმნა. მათ აქციები უკვე გამართეს. როგორც საინიციატივო ჯგუფში აცხადებენ, ამჟამად სწავლის საფასურის გადაუხდელობის გამო სტატუსი 10 000 სტუდენტს აქვს შეჩერებული.