წინანდლის ისტორიული მუზეუმის ბაღში საქართველოს სოფლის მეურნეობის სამინისტროს ინიციატივით, დღეს ქართული ყველის ფესტივალი გაიმართება.
როგორც „ნიუსპრესს“ სოფლის მეურნეობის სამინისტროდან აცნობეს, ღონისძიებაზე ადგილობრივ ბაზარზე არსებული ქართული ყველის პოპულარულ და უძველეს სახეობებს წარმოადგენენ.
ფესტივალში საქართველოს ყველა რეგიონიდან 40–მდე ყველის მწარმოებელი კომპანია და წვრილი ფერმერი მიიღებს მონაწილეობას. ისინი ყველისგან დამზადებულ ორიგინალურ ფიგურებს და ტრადიციული სუფრისთვის დამახასიათებელ ექსპონატებს ადგილზე დაამზადებენ.
ღონისძიების ფარგლებში, კომპანია „ემ ჯგუფი“ ყველისგან დამზადებულ კერძებს წარმოადგენს, რომლებიც მათ ახალ სამზარეულოში - „ქართული საგანძურია“ შესული.
მიწვეულ სტუმრებს სხვადასხვა სახეობის ხაჭაპურის, ელარჯის, ყველიანი კვერების და სხვა ტრადიციულ ქართულ კერძებთან ერთად, ღვინის დაგემოვნების საშუალებაც ექნებათ.
„საქართველო არა მხოლოდ ღვინის, არამედ ყველის სამშობლოცაა, რომლის წარმოებასაც 28 საუკუნოვანი ისტორია აქვს. ფესტივალის მიზანია ყველის, როგორც უძველესი ტრადიციული ქართული პროდუქტის პოპულარიზაცია, რაც ქართულ ნაწარმს საერთაშორისო ბაზარზე დამკვიდრებაში დაეხმარება“- აცხადებენ სოფლის მეურნეობის სამინისტროში.
ფესტივალზე საერთაშორისო ორგანიზაციების, დიპლომატიური კორპუსის, საკანონმდებლო და აღმასრულებელი ხელისუფლების წარმომადგენლებს სოფლის მეურნეობის მინისტრი ზაზა გოროზია უმასპინძლებს.
ღონისძიებას საქართველოს პარლამენტის თავმჯდომარე დავით ბაქრაძე დაესწრება.
ფესტივალის დასასრულს „ჯეოსტარის“ სხვადასხვა თაობის წარმომადგენლების მონაწილეობით კონცერტი გაიმართება.
ყველის ფესტივალზე დასწრების ყველა მსურველს უფასო ავტობუსები ემსახურება. ავტობუსები ვარდების მოედნიდან 11:00 საათზე გავა.