სააღდგომო ღვთისმსახურება საქართველოს ყველა მართლმადიდებელ ეკლესიაში 23:00 საათზე დაიწყება.
სამების საკათედრო ტაძარში საზეიმო წირვას უწმინდესი და უნეტარესი, სრულიად საქართველოს  კათოლიკოს პატრიარქი აღავლენს.

წირვის დაწყებისას სამების ტაძარში უწმინდესის სააღდგომო ეპისტოლეს წაიკითხავენ და ტაძარს ლიტანიობით სამჯერ შემოუვლიან.

სააღდგომო მსახურებაზე მღვდელმსახურები საზეიმო - თეთრ სამოსელში იმოსებიან.

ლიტურგიაზე გამთენიისას, მორწმუნეებს წმინდა ზიარების მიღების საშუალება მიეცემათ.

წირვის მსვლელობის დროს სამების ტაძარში იერუსალიმიდან, მაცხოვრის საფლავიდან გადმოსულ მადლმოსილ ცეცხლს მიაბრძანებენ. ცეცხლი საქართველოს ყველა მართლმადიდებელ ეკლესიასა და მორწმუნეებს შორის გავრცელდება.

საზეიმო მსახურების დასრულების შემდეგ, მორწმუნეებისთვის მარხვა ხსნილია. წელს დიდი მარხვა 27 თებერვალს დაიწყო.

ბრწინვალე შვიდეულში არ იკითხება ფსალმუნები, პარაკლისები, დაუჯდომელი ლოცვები, ხოლო დილა-საღამოს ლოცვების ნაცვლად იკითხება წმიდა პასექისა და ბრწყინვალე შვიდეულის ჟამნობა.

უფალი იესო ქრისტე ჯვარს წითელ პარასკევს აცვეს. მაცხოვარი აღდგომამდე სამი დღე საფლავში იყო. მე-3 დღეს მენელსაცხებელ დედებს უფლის სხეული გამოქვაბულში აღარ დახვდათ. მაცხოვრის საფლავთან მჯდომარე ანგელოზმა მათ უფლის ბრწყინვალე აღდგომა ახარა.

თავდაპირველად, მხოლოდ ვნების დღეებს აღნიშნავდნენ, ხოლო მე-4 საუკუნეში აღდგომის დღესასწაულს თანამედროვე სახე მიეცა.მისი აღნიშვნა გაზაფხულის ბუნიობის მომდევნო კვირას - იუდეველთა პასექის დასასრულს, მისგან განცალკევებით და კვირის ბოლოს აღინიშნება. ეს ახალი სტილით 4 აპრილიდან 8 მაისამდე პერიოდში ხდება. ამიტომ, აღდგომა მოძრავ დღესასწაულებს განეკუთვნება.