არასამთავრობო ორგანიზაციას "ახალი თაობა - ახალი ინიციატივა" ახალი აღმასრულებელი დირექტორი ჰყავს.  ორგანიზაციას ქეთევან ჩაჩავა უხელმძღვანელებს.
როგორც ჩაჩავამ "ნიუსპრესს" განუცხადა, ორგანიზაციის ძირითადი პრიორიტეტები უცვლელი რჩება. მუშაობა გაგრძელდება არჩევნების, ნატო-ს და ახალგაზრდობის საქმეებთან დაკავშირებულ საკითხებზე.
"იმედი გვაქვს რეგიონულ ქსელსაც გავაფართოვებთ. ჩავერთვებით ყველა აქტუალურ საკითხში და ბევრ საინტერესო პროექტს განვახორციელებთ" - აღნიშნა მან.
ჩაჩავას განმარტებით, "ახალი თაობა -ახალი ინიციატივის" გენერალურ ასამბლეაზე მიღებული გადაწყვეტილებების თანახმად, ორგანიზაციის სტრუქტურა შეიცვალა - მისი პირველი პირი აღმასრულებელი დირექტორი გახდა. დირექტორი 2 წლის ვადით ინიშნება. აირჩიეს ახალი გამგეობა, რომლის წევრების რაოდენობა 7-დან 9-მდე გაიზარდა.
ახალ გამგეობაში საზოგადოებისთვის ცნობილი პიროვნებები შევიდნენ -ექსპერტი ალექსანდრე რონდელი, გეოპოლიტიკური კვლევების საერთაშორისო ცენტრის თავმჯდომარე თენგიზ ფხალაძე და გარემოსდაცვითი საკითხების ექსპერტი ნინო სულხანიშვილი.
ღონისძიებას საქართველოში აკრედიტებული დიპლომატიური კორპუსის, საერთაშორისო და ადგილობრივი არასამთავრობო ორგანიზაციების წარმომადგენლები ესწრებოდნენ.