შრომის, ჯანმრთელობისა და სოციალური დაცვის მინისტრი ზურაბ ჭიაბერაშვილი, აუტიზმის მსოფლიო დღესთან დაკავშირებით, აუტიზმის საზოგადოებას ეწვია.
ჯანდაცვის სამინისტროს ინფორმაციით, ჭიაბერაშვილი იქ მყოფი აუტისტი ბავშვების მშობლებს გაესაუბრა. მინისტრმა პატარებს სიმბოლური საჩუქრებიც გადასცა.
"მართალია საზოგადოებაში მცირეა იმ ოჯახების რაოდენობა, ვისაც ეს პრობლემა უდგას, მაგრამ ჩვენთვის ყველა ოჯახი მნიშვნელოვანია და სწორედ ამიტომ, თითოეული მათგანის გასაჭირი ჩვენი პრობლემაც არის. იმისთვის, რომ მაქსიმალურად შევუწყოთ ხელი აუტიზმის ადრეულ გამოვლენას, მუდმივად გვექნება დიალოგი, როგორც მშობლებთან, ისე ამ სფეროს სპეციალისტებთან" - აღნიშნა ზურაბ ჭიაბერაშვილმა.
2007 წლის 18 დეკემბერს გაეროს გენერალურმა ასამბლეამ 2 აპრილი აუტიზმის შესახებ ინფორმაციის გავრცელების მსოფლიო დღედ გამოაცხადა, რასაც მსოფლიოს ყველა ქვეყანა შეუერთდა.
ამ დღის მიზანი, აუტიზმის შესახებ საზოგადოების ინფორმირებულობის გაზრდა და აუტიზმის მქონე ადამიანების ფუნდამენტური უფლებების რეალიზებაა.
გაეროს ასამბლეამ აღნიშნული გადაწყვეტილება აუტიზმის შემთხვევათა მატების საფუძველზე მიიღო. საქართველო "აუტიზმის შესახებ ცნობადობის ამაღლების მსოფლიო დღეს" 2011 წელს შეუერთდა.