დღეს კამპანიის - „საქართველო თამბაქოს გარეშე“ დღე აღინიშნება.

როგორც „ნიუსპრესს“ დაავადებათა კონტროლისა და საზოგადოებრივი ჯანმრთელობის ეროვნულ ცენტრში განუცხადეს, კამპანიის მიზანი თამბაქოსგან თავისუფალი გარემოს მნიშვნელობაზე საზოგადოების ცნობიერების ამაღლებაა.

წელს ამასთან დაკავშირებული ღონისძიებები საშუალო სკოლებსა და სამედიცინო დაწესებულებებში თამბაქოსგან თავისუფალი გარემოს შექმნის მნიშვნელობის შესახებ ინფორმირებულობის ამაღლებას მიეძღვნება.

თამბაქოს მოხმარება სიკვდილის გამომწვევი ერთ-ერთი მიზეზია. თამბაქოს გლობალური ეპიდემია წელიწადში დაახლოებით 6 მლნ მოქალაქეს კლავს, აქედან, 600 000-ზე მეტი მეორადი კვამლით იღუპება. ე.წ. პასიურ მოწევას ისეთივე შედეგები მოაქვს, როგორც აქტიურს.

2012 წლის მონაცემებით, საქართველოში მოსახლეობის 30.4% მწეველია. მათი 91.2% ყოველდღიური მწეველია, რაც ერთ-ერთი მაღალი მაჩვენებელია ევროპაში. ამჟამად, მამაკაცებში მწეველთა რაოდენობა - 55%-ს, ხოლო ქალებში დაახლოებით - 5%-ს შეადგენს. 16 წლის ახალგაზრდების 12% კი, რეგულარული მწეველია.