პარტია "დემოკრატიული მოძრაობა - ერთიანი საქართველო" ქვეყანაში გიგანტური ჰესების მშენებლობის წინააღმდეგია.
აღნიშნული განცხადება "დემოკრატიული მოძრაობის" წევრმა შალვა ოგბაიძემ დღეს "უსაფრთხო ენერგეტიკის განვითარებისა და საქართველოს ტერიტორიაზე გიგანტური კაშხლების მშენებლობის აკრძალვის თაობაზე" შემუშავებულ მემორანდუმზე ხელმოწერის ცერემონიაზე გააკეთა.
მისი თქმით, ქვეყანაში 2012 წელს 15 გიგანტური ჰესის მშენებლობა ეკოლოგიურ კატასტროფას გამოიწვევს.
"როგორც იცით, მთავრობამ 2012 წელი გიგანტური ჰესების მშენებლობის წლად გამოაცხადა. ჰესების მშენებლობით საქართველოს ეკოლოგიური საფრთხე ემუქრება. ასევე, განადგურების საფრთხის წინაშეა ქვეყნის კულტურული მემკვიდრეობა" - განაცხადა ოგბაიძემ.
მემორანდუმი პოლიტიკური პარტიებისთვის არასამთავრობო ორგანიზაციების მიერ, კამპანია - "უსაფრთხო ენერგეტიკა სიცოცხლისთვის" ფარგლებში შემუშავდა, რომელიც ქვეყანაში დიდი კაშხლების მშენებლობის შეჩერების მოთხოვნას ითვალისწინებს.
"ჩვენ საქართველოში მოქმედი პოლიტიკური გაერთიანებები ვაცხადებთ, რომ ხელისუფლებაში მოსვლის შემთხვევაში უარს ვიტყვით გიგანტური ჰესების მშენებლობაზე, ასევე შევეწინააღმდეგებით სხვა პოლიტიკური ორგანიზაციების ყველა ამგავარ ინიციატივას" - ნათქვამია მემორანდუმში.
მემორანდუმი ხელმოსაწერად ყველა პოლიტიკურ პარტიას გადაეგზავნა. მისი ინიციატორები არასამთავრობო ორგანიზაციები - "გრინფისის მხარდამჭერთა ჯგუფი", "საქართველოს მწვანეთა მოძრაობა", "მწვანე ალტერნატივა", "კავკასიური სახლი", ასოციაცია "ლობო" და "უსაფრთხო სივრცე" არიან.