საქართველოს ტექნიკური უნივერსიტეტის სტუდენტები ფინანსური დავალიანების გამო სტატუსის შეჩერებას აპროტესტებენ.

აღნიშნულთან დაკავშირებით, სტუ-ს დამოუკიდებელ სტუდენტთა ასოციაციამ უნივერსიტეტის ადმინისტრაციულ შენობასთან დღეს პრესკონფერენცია გამართა.

ასოციაციის წევრების თქმით, ადმინისტრაციიდან მათ სტატუსშეჩერებული სტუდენტების ზუსტი სია გამოითხოვეს და აღმონდა, რომ 2011-12 სასწავლო წლის ხუთი თვის მონაცემებით, მათი რიცხვი 262-ს შეადგენს.

"ეს რიცხვი კატასტროფულად იზრდება, უნივერსიტეტის ხელმძღვანელობას 4 აპრილამდე ვაძლევთ ვადას - აღუდგინოს სტატუსი ყველა სტატუსშეჩერებულ სტუდენტს, ასევე, გადაიხედოს თვითმმართველობის დებულება და თვითმმართველობის არჩევნების სარეგისტრაციო ვადამ 27 აპრილამდე გადაიწიოს" - განაცხადა ალექსანდრე კობაიძემ.

სტუდენტების განმარტებით, საქართველოს ტექნიკურ უნივერსიტეტეტში 5 აპრილს თვითმმართველობის არჩევნებია დანიშნული. არჩევნებში მონაწილეობის უფლება კი, სტატუსშეჩერებულ სტუდენტებს არ ეძლევათ.

იმ შემთხვევაში, თუ მათი მოთხოვნა არ დაკმაყოფილდება, ასოციაცია სტუდენტური თვითმმართველობის არჩევნებში არ მიიღებს მონაწილეობას და ამდენად, სტუდენტების განცხადებით, არჩევნები არადემოკრატიულად ჩატარდება, რადგან მასში მონაწილეობას მხოლოდ სტუდენტური თვითმმართველობა მიიღებს.

სტუდენტების ამ განცხადებას უნივერსიტეტის წარმომადგენელი ოთარ ზუმბურიძე გამოეხმაურა. მისი თქმით, სტუდენტის სტატუსის შეჩერება ტექნიკური უნივერსიტეტის რეგულაციაა და მთელი წლის განმავლობაში ამ სტუდენტებს თანხა არ შემოუტანიათ.

"კანონი უნდა დავიცვათ. ტექნიკური უნივერსიტეტის 17 000 სტუდენტიდან 262 გავლენას ვერ მოახდენს არჩევნების ლეგიტიმაციაზე" - განაცხადა ზუმბურიძემ.