ივანე ჯავახიშვილის სახელობის თბილისის სახელმწიფო უნივერსიტეტის ზუსტ და საბუნებისმეტყველო მეცნიერებათა ფაკულტეტზე სტუდენტური კონკურსების პროექტის პრეზენტაცია გაიმართა.
პროექტის მიხედვით, აღნიშნული ფაკულტეტის ბაკალავრიატის, მაგისტრატურისა და დოქტორანტურის სტუდენტებს საშაულება ეძლევათ მონაწილეობა მიიღონ სამი სახის კონკურსში - სტუდენტური ინოვაციების კონკურსი, სტუდენტური ნაშრომების კონკურსი და საერთაშორისო კონკურსი Microsoft Imagine Cup.
პირველი ორი კონკურსის ინიციატორი თსუ-ს ზუსტ და საბუნებისმეტყველო მეცნიერებათა ფაკულტეტია. მათი მიზანი კრეატიული სტუდენტების წახალისება და კვლევაზე დაფუძნებული სწავლების ხელშეწყობაა.
"მსგავსი კონკურსები ფაკულტეტზე პირველად ტარდება. ნაშრომების შესაფასებლად შეიქმნება სპეციალური დარგობრივი კომისია. სტუდენტური ნაშრომები დაიდება ფაკულტეტის ვებ-გვერდზე და ის საჯარო იქნება. ეს საშუალებას მისცემს სტუდენტებს საკუთარი ნაშრომები და შესაძლებლობები ფართო საზოგადოებას გააცნონ. სტუდენტები თსუ-სგან წამახალისებელ პრიზებსაც მიიღებენ" - განაცხადა ზუსტ და საბუნებისმეტყველო მეცნიერებათა ფაკულტეტის დეკანმა რამაზ ბოჭორიშვილმა.