საქართველოს "მწვანეთა პარტია" ქვეყანაში ატომური სადგურების შესაძლო მშენებლობას და ბირთვული ტექნოლოგიების ტრანზიტს აპროტესტებს.
როგორც პარტიის გენერალურმა მდივანმა გიორგი გაჩეჩილაძემ დღეს პრესკონფერენციაზე განაცხადა, საქართველოს ხელისუფლება ქვეყანაში ატომური სადგურების მშენებლობას გეგმავს.
მისი ინფორმაციით, პარლამენტმა "ბირთვული და რადიაციული უსაფრთხოების შესახებ" ახალი კანონპროექტის განხილვა დაჩქარებული წესით დაიწყო.
მოქმედი კანონის მიხედვით, ბირთვული ობიექტების, მათ შორის, ატომური სადგურების მშენებლობა აკრძალულია, ახალი კანონპროექტის თანახმად კი, მათი მშენებლობა დასაშვები ხდება.
"მწვანეთა პარტია" კანონპროექტის განხილვის შეჩერებას მოითხოვს.
ამასთან, "მწვანეთა პარტია" საქართველოში გაერო-სა და ევროკომისიის წარმომადგენლობებს და აშშ-ს საელჩოს ბირთვული ტექნოლოგიების მიწოდების აკრძალვის მოთხოვნით მიმართავს.