საქართველოს მთავრობის დადგენილებით, სამედიცინო მედიაციის სამსახურის მომსახურება ფასიანი გახდა, რასაც "ახალი მემარჯვენეები" აპროტესტებენ.

"ახალი მემარჯვენეების" ეკონომიკური მიმართულების ხელმძღვანელის ლევან კალანდაძის განმარტებით, იურიდიულმა პირებმა მედიაციის სამსახურს გადაწყვეტილების მიღებისთვის 500 ლარი უნდა გადაუხადონ. ფიზიკური პირებისთვის გადასახდელი თანხის ოდენობას "ჯანმრთელობისა და სოციალური დაცვის სამინისტრო" 2012 წლის 1 ივნისამდე განსაზღვრავს.

"მთავრობამ ფასიანი მედიაციის შემოღებით უმწეოების, პედაგოგებისა და პენსიონერების ინტერესების დაცვისგან "ხელები დაიბანა". ეს არაპირდაპირი და ფარული გზით მოქალაქეებისთვის გადასახადების გაზრდაა" - განაცხადა კალანდაძემ.

იგი აღნიშნავს, რომ ამ საფასურის დაწესება სადაზღვევო კომპანიებისა და სამედიცინო დაწესებულებებში დაზარალებული პაციენტების მიმართვის რაოდენობას მნიშვნელოვნად შეამცირებს.

მისი თქმით, პრეზიდენტმა პარლამენტში გამოსვლისას დაზღვეული პირებისთვის სადაზღვევო და სამედიცინო მომსახურების ხარისხის გაუმჯობესებაზე ისაუბრა, თუმცა, კალანდაძის თქმით, მისი გამოსვლიდან ცოტა ხანში მთავრობამ მედიაციის სამსახურით სარგებლობა ფასიანი გახადა.

"ახალი მემარჯვენეები" მთავრობას მოუწოდებენ - უარი თქვას აღნიშნულ გადაწყვეტილებაზე და სამედიცინო მედიაციის მომსახურება ისევ უფასო გახადოს.