საქართველოს თავდაცვის სამინისტროს, მახათას მთაზე ტაძრის მშენებლობის ფონდ „ივერიის“ დამფუძნებელი პაატა ბურჭულაძე სტუმრობდა.

სამინისტროს პრესსამსახურის ინფორმაციით, პაატა ბურჭულაძემ უწყების თანამშრომლებთან შეხვედრაზე მახათას მთაზე, ივერიის ღვთისმშობლის ხატის სახელობის ტაძრის და სამონასტრო კომპლექსის მშენებლობის შესახებ ისაუბრა.

სრულიად საქართველოს კათოლიკოს პატრიარქის კურთხევით, ყველას, განურჩევლად ეროვნებისა, წოდებისა, განათლებისა თუ ეკონომიური მდგომარეობისა, საშუალება აქვს წვლილი შეიტანოს ტაძრის მშენებლობაში.

თავდაცვის უწყებაში გამართულ შეხვედრას თავდაცვის მინისტრიც დაესწრო. ირაკლი ალასანია დღეს ფონდში „ივერიისა“ ოფიციალურად გაწევრიანდა.

თავდაცვის სამინისტროს სამოქალაქო ოფისის და გაერთიანებული შტაბის თანამშრომლებისთვის დღესვე ათონის მთის ივერიის ღვთისმშობლის ხატის შესახებ დოკუმენტური ფილმის „ღირს არს ჭეშმარიტად“ ჩვენება გაიმართა.

2011 წელს საქართველოს კათოლიკოს-პატრიარქმა ტაძრის საძირკველი აკურთხა. მშენებლობა 2012 წლის გაზაფხულზე დაიწყო.

აქციაში საქართველოს 204 ათასზე მეტი მოქალაქე და უცხოეთში მცხოვრები ქართველი მონაწილეობს.