ტყიბულის რაიონში ხე-ტყის უკანონო ჭრებთან დაკავშირებით, გარემოს დაცვისა და ბუნებრივი რესურსების კომიტეტის თავმჯდომარემ, გიორგი ცაგარეიშვილმა და ტყიბულის რაიონის მაჟორიტარმა დეპუტატმა, ელისო ჩაფიძემ პრესკონფერენცია გამართეს.

მათი ინფორმაციით, შემოწმების შედეგად გამოვლინდა, რომ ტყიბულის რაიონში უნებართვოდ მოჭრილია 329 ძირი სხვადასხვა ჯიშისა და დიამეტრი ხეები, ხოლო უკანონო ჭრით გარემოსათვის მიყენებულმა ზიანმა, ჯამში 193 904 ლარი შეადგინა.

„ჩვენ ქვეყანაში მიდგომები შეიცვალა და ვერც ერთი ადამიანი ვეღარ გაბედავს ველური წესით გაანადგუროს ბუნება და ზიანი მიაყენოს იმ გარემოს, სადაც ჩვენ და ჩვენი მომავალი თაობები იზრდებიან. კომიტეტი სრული პასუხისმგებლობით აცხადებს, რომ არ შეეგუება სააკაშვილის მმართველობის პერიოდში დამკვიდრებულ უკანონობას. კანონი იქნება ძალიან მკაცრი და შეუწყნარებელი ყველა იმ ადამიანის მიმართ, რომლებიც სპობენ ჩვენ გარემოს“ - განაცხადა პრესკონფერენციაზე გიორგი ცაგარეიშვილმა.

ელისო ჩაფიძის განცხადებით კი, არც სანიტარულ ჭრებთან და არც მეწარმეების საქმიანობასთან მას, როგორც ტყიბულის მაჟორიტარ დეპუტატს საწინააღმდეგო არა აქვს, მაგრამ ვერავითარ შემთხვევაში ვერ შეეგუება და არ დაუშვებს უკანონო ხის ჭრას და რაიონის ეკოგარემოს განადგურებას.