ეროვნულ-დემოკრატიულმა ინსტიტუტმა (NDI), დღეს, საზოგადოებრივი აზრის კვლევის შედეგები წარადგინა.

შედეგების თანახმად, საქართველოში ხელისუფლების შეცვლის შემდეგ, პრემიერ-მინისტრ ბიძინა ივანიშვილს რესპონდენტთა 80%, ხოლო პარლამენტის თავჯდომარე დავით უსუფაშვილს 63% დადებითად აფასებს.
რესპონდენტთა ასევე 63%-მა, მათ შეხედულებებთან ყველაზე ახლოს მდგომ პარტიად, კოალიცია „ქართული ოცნება“ დაასახელა.

რაც შეეხება პრეზიდენტ მიხეილ სააკაშვილს, მას დადებითად რესპონდენტთა 29% აფასებს, ხოლო „ერთიანი ნაციონალური მოძრაობა“, გამოკითხულთა 10%-ის შეხედულებებთან დგას ახლოს.

NDI–ის კვლევა, მიზნად ისახავდა ქართველი ამომრჩევლების დამოკიდებულებების გაზომვას 2012 წლის 1 ოქტომბრის საპარლამენტო არჩევნების მიმართ, აგრეთვე პოლიტიკოსებისა და პოლიტიკური პარტიების საქმიანობის შეფასებას.

აღნიშნული შედეგები წარმოადგენს საზოგადოებრივი აზრის კვლევის - „საზოგადოების განწყობა საქართველოში“ - შემადგენელ ნაწილს, რომლის მიხედვითაც მოსახლეობისთვის ყველაზე მნიშვნელოვანი საკითხებია სამუშაო ადგილები და ხელმისაწვდომი სამედიცინო მომსახურება.

„საპარლამნეტო არჩევნების შემდგომ, კოალიცია ქართული ოცნებისა და პრემიერი ივანიშვილის რეიტინგი ყველაზე მაღალია, რაც აქამდე ჩვენს კვლევებში დაფიქსირებულა. ამასთან, როგორც ქართული ოცნების, ისე ნაციონალური მოძრაობის მხარდამჭერთა უმრავლესობა მიიჩნევს, რომ ქვეყანა სწორი მიმართულებით ვითარდება“ - განაცხადა NDI საქართველოს ოფისის დირექტორმა ლუის ნავარომ დღევანდელ ბრიფინგზე.

NDI-ის კვლევებს აფინანსებს შვედეთის საერთაშორისო თანამშრომლობის და განვითარების სააგენტო (Sida) და კავკასიის კვლევითი რესურსების ცენტრი (CRRC) ატარებს.