სს „თელასიდან“ გათავისუფლებული თანამშრომლების საკითხის მოგვარების მიზნით, ენერგეტიკის სამინისტროში შექმნილი კომისიის მუშაობის პირველი ეტაპის შედეგად, 107 ყოფილი თანამშრომლიდან 73-მა ხელახლა დაიწყო მუშაობა კომპანიაში.
ამის შესახებ ინფორმაცია „ნიუსპრესს“ „თელასის“ პრესსამსახურმა მიაწოდა.
რაც შეეხება დარჩენილ, ყოფილ თანამშრომლებს, პრესცენტრის ინფორმაციით, მათთან კომპანია „თელასის“ ადმინისტრაცია მუშაობს და მათ მიმართ, გამოცდილებისა და კვალიფიკაციის გათვალისწინებით, ინდივიდუალური შეთავაზებები იქნება.
„ჩვენ გულისყურით ვეკიდებით შექმნილ ვითარებას და ყველაფერს გავაკეთებთ საკითხის უმოკლეს დროში მოსაგვარებლად, კომპანიის ხელმძღვანელად დანიშვნის დღიდან აქტიურად ვარ ჩართული ამ პროცესში“ - აცხადებს „თელასის“ გენერალური დირექტორი დევი კანდელაკი.
სპეციალური კომისია სს „თელასიდან“ გათავისუფლებული თანამშრომლების საკითხის მოგვარების მიზნით ოქტომბერში ენერგეტიკის და ბუნებრივი რესურსების მინისტრის კახა კალაძის ინიციატივით შეიქმნა. კომისიის შემადგენლობაში სამინისტროს, სს „თელასის“ და კომპანიის პროფკავშირების წარმომადგენლები შედიან.