თბილისის მერი გიგი უგულავა სკოლამდელი აღზრდის დაწესებულებების თანამშრომლებს შეხვდა და მათ საბავშვო ბაგა-ბაღების მართვის სააგენტოს ახალი ხელმძღვანელი - რამაზ სულამანიძე წარუდგინა. შეხვედრაზე გიგი უგულავამ თბილისის მერიის 2013 წლის მთავარ პრიორიტეტებზე, დაგეგმილი პროექტების განხორციელებასა და სამომავლო გეგმებზე ისაუბრა.

მერიის პრესსამსახურის ინფორმაციით, მომავალი წლიდან იმ დაწესებულებებში, რომელებსაც თბილისის მერია აფინანსებს, შრომითი ანაზღაურება 20%-ით გაიზრდება. 2013 წლიდან გაზრდილ ხელფასს აიღებენ საბავშვო ბაღების, თბილისის სატრანსპორტო კომპანიის, სამედიცინო დახმარების ცენტრის, საგანგებო და გადაუდებელი სიტუაციების მართვის სააგენტოს, დასუფთავების სფეროსა და თბილისის თვითმმართველობის სტრუქტურების თანამშრომლები. ასევე 100%-ით განახლდება სასწრაფო დახმარების საავტომობილო პარკი და რეაბილიტაცია ჩაუტარდება სასწრაფო დახმარების ცენტრებს.

უგულავამ შეხვედრაზე კომუნალური ვაუჩერიზაციის პროგრამაზეც ისაუბრა.