საარჩევნო სისტემების საერთაშორისო ფონდის (IFES) ორგანიზებით, ქუთაისში, სასტუმრო "ბაგრატი 1003“-ში, მრგვალი მაგიდა "გენდერული თანასწორობა და ქალის პოლიტიკურად გაძლიერება“ - მოეწყო.

პარლამენტის პრესსამსახურის ინფორმაციით, ღონისძიებაში, რომლის მიზანსაც საზოგადოებაში ქალთა პოლიტიკურ გაძლიერებასთან დაკავშირებით არსებული ნეგატიური სტერეოტიპების, დისბალანსისა და არასწორი დამოკიდებულების აღმოფხვრა წარმოადგენდა, მონაწილეობა პარლამენტის, სამოქალაქო საზოგადოების და მედიის წარმომადგენლებმა მიიღეს.

პარლამენტის პრეს-სამსახურის ინფორმაცითვე, მრგვალი მაგიდა გენდერული საბჭოს ხელმძღვანელმა, პარლამენტის თავმჯდომარის პირველმა მოადგილემ, მანანა კობახიძემ გახსნა, რომელმაც აღნიშნული კონფერენციის მნიშვნელობაზე და პოლიტიკაში ქალთა როლის გაძლიერების თაობაზე ისაუბრა.

"ჩვენთვის, პოლიტიკოსებისათვის საინტერესოა არასამთავრობო ორგანიზაციების და სამოქალაქო საზოგადოების მოსაზრებები თუ როგორ უნდა მოხდეს გენდერული თანასწორობა და ქალთა როლის გაძლიერება პოლიტიკურ ასპარეზზე. ჩვენ მზად ვართ მოვისმინოთ მათი შეხედულებები და შეძლებისდაგვარად საკანონმდებლო დონეზე ავსახოთ" - განაცხადა მანანა კობახიძემ.

ღონისძიება "ამერიკის შეერთებული შტატების საერთაშორისო განვითარების სააგენტოს“ (USAID) მხარდაჭერით ხორციელდება. კონფერენცია მიეძღვნა ასევე ქალთა მიმართ ძალადობის წინააღმდეგ მიმართულ საერთაშორისო 16 დღიან კამპანიას.