საქართველოს ეროვნული მუზეუმის შალვა ამირანაშვილის სახელობის ხელოვნების მუზეუმში, გამოფენა სახელწოდებით „მემკვიდრეობა და თანამედროვეობა“ გაიმართება.

გამოფენა, ქართველი ხელოვნებათმცოდნის მერი კარბელაშვილის დაბადებიდან 85 წლის იუბილეს ეძღვნება.
მუზეუმის საზოგადოებასთან ურთიერთობის სამსახურის ინფორმაციით, გამოფენაზე თავმოყრილია იმ მხატვართა ნამუშევრები, რომელთა შემოქმედების შესწავლასა და კვლევასაც მერი კარბელაშვილის სამეცნერო მემკვიდრეობის უმთავრესი ნაწილი ეთმობოდა. ექსპოზიციაზე აგრეთვე, თავმოყრილია ფერწერული და გრაფიკული ნამუშევრები, ქანდაკება, რომელთა ნაწილის ექსპონირება პირველად ხდება.

გამოფენაზე წარმოდგენილ ექსპონატთა ძირითადი ნაწილი დაცულია შ. ამირანაშვილის სახელობის ხელოვნების მუზეუმის ფონდებში, მეორე ნაწილი მონაწილე მხატვრებს ეკუთვნის, ზოგი ნამუშევარი კი თვით მერი კარბელაშვილის კუთვნილება იყო.

გამოფენა დღეს 17 საათზე დაიწყება და 12 დეკემბრამდე გაგრძელდება.