სპორტისა და ახალგაზრდობის საქმეთა სამინისტროში ბერძნულ-რომაულ ჭიდაობაში მსოფლიოს 4-გზის და მეხიკოს 1968 წლის ოლიმპიური თამაშების ჩემპიონის - რომან რურუას 70 წლის საიუბილეო თარიღთან დაკავშირებით საგანგებო შეხვედრა გაიმართა.

სამინისტროს პრესსამსახურის ინფორმაციით, შეხვედრას სამინისტროს ხელმძღვანელებთან, ვეტერან სპორტსმენებთან, ოლიმპიურ ჩემპიონებთან და მედიის წარმომადგენლებთან ერთად, საქართველოს პრემიერ-მინისტრი - ბიძინა ივანიშვილი დაესწრო.

ბიძინა ივანიშვილმა რომან რურუას საიუბილეო თარიღი მიულოცა და იუბილესთან დაკავშირებით ოქროს ლომის ქანდაკებით დააჯილდოვა, სპორტისა და ახალგაზრდობის საქმეთა მინისტრმა - ლევან ყიფიანმა კი ოლიმპიურ და მსოფლიო ჩემპიონს სპორტის რაინდის წოდება გადასცა, ვეტერან მოჭიდავეს ასევე გადაეცა - ჭიდაობის საერთაშორისო ფედერაციის (FILA) ორდენი.

შეხვედრაზე ნაჩვენები იყო სპორტული ჟურნალისტის - თამარ ბალავაძის ფილმი ოლიმპიურ ჩემპიონებზე მომზადებული დოკუმენტური ფილმების სერიიდან - „ერთი ჩემპიონის ისტორია", ასევე მოეწყო რურუას საავტორო წიგნის - „ქალამნებიდან ჩემპიონობამდე და კიდევ..." პრეზენტაცია.