გერმანიის ელჩი ორთვინ ჰენიგი, დღეს, 2012 წლის 19 ივლისის სტიქიისაგან დაზარალებულ იმ სოფლებს მოინახულებს, რომლებშიც პროექტი, „კახეთის ოთხი სოფლის სასოფლო-სამეურნეო საწარმოების აღდგენა“ განხორციელდა.
ელჩი კახეთს საქართველოს მთავრობის წარმომადგენლებთან ერთად ესტუმრება.
გერმანიის საელჩოს პრეს-სამსახურის ინფორმაციით, პროექტისათვის, გერმანიის საგარეო საქმეთა ფედერალური სამინისტროს ჰუმანიტარული დახმარების ფონდიდან 50 ათასი ევრო გამოეყო. ეს თანხა სტიქიური უბედურებისაგან ყველაზე მეტად დაზარალებული, გურჯაანის რაიონის ოთხი სოფლის (ვაზისუბნის, კალაურის, შაშიანისა და ვაჩნაძის) სასოფლო-სამეურნეო საწარმოების აღდგენას მოხმარდა.
საელჩოს ინფორმაციითვე, გერმანული პროექტი, ადგილზე ჰუმანიტარულმა ორგანიზაციამ (CIC) განახორციელა. ორგანიზაცია, პროექტისათვის გამოყოფილი თანხით ოთხი სოფლის გლეხებს განადგურებული მოსავლის შენარჩუნების, სათესი ფართობების აღდგენის, ახალი სათესლე მასალის, სასუქებისა და მცენარეთა დაცვის საშუალებების შეძენის საქმეში დაეხმარა.