ილიაუნის თეატრში,  ილიას სახელმწიფო უნივერსიტეტის წმ. გიორგის სახელობის აუტიზმის ცენტრის  და ფონდი ”ღია საზოგადოება საქართველოს”  ორგანიზებით, ხვალ საახალწლო   წარმოდგენა ”ზამთრის
სიზმარი” გაიმართება.
 პიესის ავტორი და დამდგმელი რეჟისორი ილიას სახელმწიფო უნივერსიტეტის სარეჟისორო ფაკულტეტის კურსდამთავრებული თიკო მუზაშვილია. სპექტაკლში მონაწილეობას იღებს  აუტიზმის ცენტრის 12 სასკოლო ასაკის მოსწავლე, მათი კლასელები  და ილიაუნის სამსახიობო ფაკულტეტის სტუდენტები.  ღონისძიება
ეძღვნება შეზღუდული შესაძლებლობების პირთა საერთაშორისო დღეს, რომელიც ყოველ წელს 3 დეკემბერს აღინიშნება.
ილიას უნივერსიტეტის პრესსამსახურის ცნობით, უნივერსიტეტის წმინდა გიორგის სახელობის აუტიზმის ცენტრი 2010 წლის მაისში გაიხსნა. მისი მიზანია აუტისტური სპექტრის დარღვევის მქონე პირების საბაზისო უნარების ჩამოყალიბება და სკოლაში ინკლუზია. ცენტრი აუტისტური სპექტრის დარღვევის მქონე 3-დან 7 წლამდე ასაკის ბავშვებს ემსახურება. 
                
                          
                        
                        
                        
                             
                        
                        
                        
                        
                                 
 
                                 
                                 
                                 
                                 
                                 
                                 
                                



 
                        
                                     
                                     
                                     
                                     
                                     
                                    












