ამერიკულ სახლ "ლანგეითში" ტრადიციული „ამერიკული საღამოების ციკლი გრძელდება.“
„ლანგეითის“ პრესსამსახურის ინფორმაციით, ხვალ ცენტრი ქართველი ხელოვანის შოთა ებანოიძის საღამოს უმასპინძლებს.
ებანოიძე უკვე მრავალი წელია ამერიკაში ცხოვრობს და მოღვაწეობს. რამდენიმე წლის წინ მან ცინცინატში ქართველი, უკრაინელი და ებრაელი ემიგრანტებისთვის ცეკვისა და სიმღერის ანსამბლი დააფუძნა. ანსამბლის რეპერტუარში შედის როგორც ქართული, ისე მსოფლიო ხალხთა ფოლკლორული სიმღერები და ცეკვები. შოთა ებანოიძე ანსამბლის წევრებისთვის ეროვნულ სამოსს და საკონცერტო რეკვიზიტებს თავად ქმნის.
"ლანგეითში" გამართულ საღამოზე ამერიკაში მოღვაწე ხელოვანთან სკაიპ-კონფერენცია გაიმართება.

წარმოდგენილი იქნება მისი დიზაინით შექმნილი სამოსი, დარბაზში გაიჟღერებს ანსამბლის წევრების, მათ შორის სხვადასხვა ეროვნების ადამიანების მიერ ქართულად შესრულებული სიმღერები, ნაჩვენები იქნება ფრაგმენტები სხვადასხვა საკონცერტო გამოსვლებიდან. "ლანგეითის" სტუმრებს შორის იქნებიან ანსამბლ "ერისიონის" ყოფილი მოცეკვავეები, ასევე ემიგრანტი ხელოვანის კოლეგები და მეგობრები.

საღამოს ჟურნალისტი მზია გოგნიაშვილი წაიყვანს.