კომპანია „თელასის“ პრობლემებზე მომუშავე კომისია მომდევნო სხდომას მიმდინარე წლის 26 ნოემბერს გამართავს.

ამის შესახებ ინფორმაციას ენერგეტიკის სამინისტროს პრესსამსახური ავრცელებს.

რაც შეეხება უკვე გამართულ პირველ სამუშაო შეხვედრას, მასზე გათავისუფლებული თანამშრომლების სამსახურში აღდგენის შესახებ იმსჯელეს. კომისიაზე შეთანხმდნენ, რომ მომავალი სხდომისთვის „თელასი“ თითოეულ დათხოვნილ თანამშრომელზე ფაქტებს წარმოადგენს, რის საფუძველზეც ეს ადამიანები სამსახურიდან დაითხოვეს. გარდა ამისა, პროფკავშირებისა და „თელასის“ წარმომადგენლები კომისიას სამსახურიდან დათხოვილი თანამშრომლების დაზუსტებულ სიას წარუდგენენ. კომისია როგორც ივნისში, ასევე სექტემბერში გათავისუფლებული თანამშრომლების საკითხს განიხილავს.

ამასთან, კომისია იმ თანამშრომლების შესახებაც იმსჯელებს, რომლებიც კომპანიაში ივნისში განხორციელებული რეორგანიზაციის დროს თანამდებობრივი პოზიცია შეეცვალათ.

კომისია ენერგეტიკისა და ბუნებრივი რესურსების მინისტრის ინიციატივით შეიქმნა და მასში სამინისტროს, პროფკავშირებისა და „თელასის“ წარმომადგენლები შედიან.