იძულებით გადაადგილებულ პირთა ეკონომიკური ინტეგრაციისა და მათი ბიზნესში ჩართულობის თემაზე ხვალ კონფერენცია გაიხსნება.

კონფერენციას USAID-ის მისიის დირექტორი სტივენ ჰეიკინი გახსნის. კონფერენცია ეძღვნება USAID-ის მიერ მხარდაჭერილ პროგრამას, რომელიც განხორციელდა CTC-ის მიერ და რომელიც მიზნად ისახავდა 2008 წლის აგვისტოს ომის შედეგად ახალ დასახლებულ პუნქტებში მცხოვრებ იძულებით გადაადგილებულ პირთა ეკონომიკურ ინტეგრაციას. პროექტის ბენეფიციარები არიან ქვეყნის შიგნით იძულებით გადაადგილებული პირები და ისინი ვინც ახალ დასახლებებსა ან ომით დაზარალებულ სოფლებში ცხოვრობენ.

USAID-ის ინფორმაციით, პროექტის ფარგლებში 300-ზე მეტმა იძულებით გადაადგილებულ პირმა მიიღო ბაზისური ცოდნა და უნარი როგორ წამოიწყოს და მართოს მცირე ბიზნესი. ამ ტრეინინგის შედეგად, ბენეფიციარებმა შეიმუშავეს ბიზნეს გეგმები და მონაწილეობა მიიღეს მცირე საგრანტო პროგრამაში, რამაც საშუალება მისცა 208 ბენეფიციარს, მათ შორის 82 ქალს, დაეწყო საკუთარი ბიზნესი და მოეპოვებინა ეკონომიკური დამოუკიდებლობა. ამ პროექტით შესაძლებელი გახდა ბენეფიციარებისთვის შემოსავლის საშუალოდ 30%-მდე გაზარდა, შეიქმნა დაახლოებით 250 სამუშაო ადგილი ომით დაზარალებულთა ოჯახებსა და თემებისთვის, რამაც გაზარდა ბენეფიციარების თვითშეფასება და ეკონომიკური დამოუკიდებლობა.

პროექტი გაიმართა USAID-ის განვითარების საგრანტო პროგრამის მხარდაჭერით, რომელიც წარმოადგენს USAID-ის მიერ განხორციელებული ინკლუზიური და მდგრადი ეკონომიკური ზრდის პროექტის ნაწილს საქართველოში.